كحك العيد بالبيكنج بودر وبحشواته المختلفه

المقادير

مقادير كيلو دقيق واللى عايز يزود يضاعف المقادير
كيلو دقيق
نص كيلو سمن
3 علب زبادى وتكملة العجن بلبن على حسب الاحتياج
معلقة بيكنج بودر
ذرة ملح
كبشة سمسم بالايد كده
معلقة صغيره محلب مطحون
زجاجة صغيره ريحة موز او ورد  على حسب الرغبه

الطريقه 

نضع السمن على النار ليسخن و نخلط البيكنج بودر وذرة الملح بالدقيق وبعدين نعمل

حفره ونحط فيها السمسم وبعدين ننزل بالسمن السخن على السمسم وده علشان السمن السخن يحمص السمسم وريحته تطلع فورا على الدقيق
وبعدين بمعلقه خشب نقوم بتقليب الخليط حتى تبرد السمنه قليلا ونبس العجين بالايد ونشرب على الدقيق بالسمن كويس جدا مش اقل من 10 دقايق وبعدين نحط الزبادى
والروايح والمحلب ونعجن تانى كويس جدا ولو العجينه لينه فى ايدك وكويسه خلاص لو حسيتى انها محتاجه تتطرى شويه حطى شوية لبن دافى شوى شوى براحه واعجنى

وهكذا لحد ما توصلى لنتيجة كويسه وبعد ما يخلص نغطيه بكيس نايلون
وبعدين نعمل الحشو وهو
 
اولا حشوة الملبن 

نجيب الملبن زى ماهو بالدقيق بتاعه ونحط عليه شوية سمسم وسودانى

مجروش ولو عايزه تزودى اى مكسرات حسب الرغبه براحتك وشوية سمنه سايحه من

بتاعة العجين ونعجن الملبن بكل ده هيبقى معانا خليط حلو اوى وف نفس الوقت مش بيمسك بالايد

حشوة العجوه 

ممكن تحطيها زى ماهو لو هى مفرومه جاهزه وممكن برضو تحطى عليه

شوية سمنه وتحركيها شويه ع النار بالمكسرات زى الملبن او تحطى المكسرات 

جوه الحشو

حشوة العجميه .

. ربع كوب سمن على النار وعليهم نص كوب دقيق ونحمرهم كاننا بنعمل

بشاميل بس منحرقهوش يعنى يبقى ذهبى كده وبعدين نحط عليهم 3 معالق سمسم  ونقلب لحظه وبعدين كوب عسل ابيض ونفضل نقلب لحد ما يبقى معانا خليط تقيل شويه

وفى الاخر اطفى النار وزودى اى نوع مكسرات تحبيه وسبيها تبرد خالص لحد ما تبقى متماسكه قريبه من الملبن كده واحشى بيها
(وعلى فكره ممكن تتعمل بالعسل الاسود بدل الابيض للى يحب يجرب )

وخلى بالك وانتى بتسويه

‏‎منال ابوالعزم